Reynsla úr þremur geirum

Áratugareynsla sem stjórnandi, ráðgjafi og greinandi — með bakgrunn úr fjármálakerfinu, opinberri stjórnsýslu og leiðtoga- og teymisþjálfun.

Hjördís hóf feril sinn sem hagfræðingur hjá Seðlabanka Íslands og starfaði síðar sem sérfræðingur hjá Glitni. Eftir hrun var hún ópólitískur ráðgjafi fjármálaráðherra og leiddi næst endurskipulagningu eigna hjá Landsbankanum á árunum 2010–2012, þar sem hennar fólk bar ábyrgð á endurskipulagningu fyrirtækja, lögfræðiinnheimtu, fullnustueignum og umsýslu þeirra.

Hennar kjarnafærni er breytinga- og krísustjórnun og hún hefur margþætta reynslu af stefnumótun, innleiðingu breytinga og endurskipulagningu í víðu samhengi. Hún hefur tvívegis verið skipuð af Alþingi sem varamaður í Fjármálaráð þar sem helsta ábyrgðarsvið hennar voru fjármál sveitarfélaga. Í dag rekur hún eigin starfsemi sem leiðtoga- og teymisþjálfi.

Í gegnum ferilinn hefur Hjördís lært hversu mikilvægur mannlegi þátturinn er og leggur áherslu á að hugað sé að honum strax í upphafi allrar umbótavinnu. Hún vill sjá sjálfbæran fjárhag borgarinnar, bætta líðan starfsfólks og gæði ákvörðunartöku — og er tilbúin að beita sér af fullum krafti veiti borgarbúar henni umboð til þess.