Framboðslistinn

1. sæti

Ingimar Þór Friðriksson

Í dag starfar Ingimar hjá Betri lausnum ehf. við ráðgjöf og þróun hugbúnaðar, meðal annars fyrir sveitarfélög.

Hann er menntaður tölvunarfræðingur og MBA. Hann er árangursríkur stjórnandi með yfirgripsmikla reynslu af rekstri sveitarfélaga, frá háskólasamfélaginu og fjármálageiranum.

Ingimar hefur setið í fjölda stjórna, nefnda og ráða fyrir hönd ólíkra aðila. Meðal annars hefur hann setið í Íbúaráði Grafarvogs, stjórn Rannsóknar- og háskólanets Íslands, stjórn fagstaðlaráðs í upplýsingatækni og Stafrænu ráði Sambands íslenskra sveitarfélaga, svo fátt eitt sé nefnt

Sem forstöðumaður upplýsingatækni og þjónustuvers hjá Kópavogsbæ í 14 ár hefur hann komið að mótun og innleiðingu fjölda hagræðingarverkefna ásamt ráðgjöf við önnur sveitarfélög. Samhliða öðrum störfum sinnti Ingimar í 11 ár kennslu við Háskólann í Reykjavík.

Hann vill sjá aukið gagnsæi og gott aðgengi að upplýsingum til að styðja við ákvörðunartöku og hagræðingu. Góð þjónusta við borgarbúa er honum afar hugleikin og hann vill nýta rafrænar mælingar á þjónustustigi til að geta brugðist við og aðlagað þjónustu að þörfum borgarbúa.

Hvað segir Torfi ráðningasérfræðingurinn, hvers vegna var Ingimar valinn á listann?

„Yfirburða reynsla og þekking á því hvernig upplýsingatæki getur bætt þjónustu við íbúa og bætt rekstur sveitafélaga. Ingimar hefur á árunum 2011-2025 leitt framþróun upplýsingatækni hjá Kópavogsbæ og verið leiðandi í þeim málum á landsvísu.

Kópavogur er næst stærsta sveitafélag landsins á eftir Reykjavík og glímir við sömu áskoranir.

Því er það okkur Reykvíkingum mjög mikilvægt að Ingimar verði kosinn í borgarstjórn. Við þurfum á hans þekkingu að halda.“

2. sæti

Hjördís Dröfn Vilhjálmsdóttir

Í dag starfar Hjördís sem leiðtoga- og teymisþjálfi. Hún er menntuð í hagfræði, stjórnun, stefnumótun og þjálfun einstaklinga og teyma. Bakgrunnur hennar er fjármálakerfið þar sem hún vann sem greinandi, rágjafi og stjórnandi.

Eftir hrun starfaði hún sem ópólistískur ráðgjafi fjármálaráðherra í pólitísku starfi. Þar voru verkefni hennar að mestu tengd fallandi fjármálafyrirtækjum, umsýslu og mótun eignarhalds þeirra, samskiptum við erlendar stofnanir eftirlitsaðila, kröfuhafa og fréttafólk.

Sem framkvæmdastjóri endurskipulagningar eigna hjá Landsbankanum frá 2010-2012 var hún og hennar fólk ábyrg fyrir endurskipulagningu fyrirtækja, lögfræðiinnheimtu, fullnustueignum og umsýslu þeirra. Samhliða því var hún framkvæmdastjóri Bíla- og tækjafjármögnunar þar sem verkefnið var að sameina tvö fallin fjármálafyrirtæki (SP fjármögnun og Avant) og renna inn í bankann. Hún hefur í tvígang verið skipuð af Alþingi sem varamaður í Fjármálaráð þar sem hún koma að mótun á starfsemi ráðsins og skrifum í fyrstu álitsgerðir þess um fjármálastefnu og fjármálaáætlun ríkisstjórnarinnar. Hennar helsta ábyrgðarsvið þar var fjármál sveitarfélaga. Hún býr einnig yfir fjölbreyttri reynslu af stjórnarsetu og tengdum verkefnum þar sem hún hefur m.a. verið stjórnarformaður Listdansskóla Íslands ses. í nokkur ár og formaður endurskoðunarnefndar Regins í áratug.

Reynsla og þekking Hjördísar spannar því afar breitt svið. Hún er með víðtæka reynslu af umbreytingum, breytingastjórnun, stefnumótun, innleiðingu breytinga og endurskipulagningu í víðu samhengi. Í gegnum ferilinn hefur hún lært hversu mikilvægur mannlegi þátturinn er og leggur mikla áherslu á að hugað sé að honum strax í upphafi allrar umbótavinnu.

Hún vill sjá umbætur sem fela í sér bætta líðan starfsfólks því hún trúir því að líðan starfsfólks sé grundvöllur framfara. Lykilþáttur í því er að styrkja vinnustaðamenningu allt frá borgarfulltrúum og til starfsfólksins. Sjálfbær fjárhagur borgarinnar er einnig forgangsatriði því hann er forsenda þess að unnt sé að viðhalda núverandi þjónustustigi til lengri tíma litið. Þar skiptir skilvirkni og gæði ákvörðunartöku lykilhlutverki við að viðhalda ábyrgri fjármálastjórn og því að nýting fjármuna sé sem best.

Hjördís nýtur sín best þegar hún er að takast á við umfangsmiklar áskoranir og er tilbúin að beita sér af fullum krafti veiti borgarbúar henni umboð til þess.

Hvað segir Torfi ráðningasérfræðingurinn, hvers vegna var Hjördís valin á listann?

„Reynsla Hjördísar af breytingastjórnun, rekstri, fjármálum og endurskipulagningu stórra rekstrareininga stórfyrirtækja og stofnana mun nýtast einstaklega vel í þeim flókna og umfangsmikla rekstri sem um er að ræða í Reykjavík. Einnig er mjög mikilvægt að Hjördís leggur áherslu á mannlega þáttinn og líðan starfsfólks sem vill oft gleymast þegar verið er að endurskipuleggja rekstur og þjónustu.“

3. sæti

Torfi Markússon

Torfi hefur starfað um áratugabil við ráðningar og mannauðsmál. Síðastliðin 16 ár hefur hann verið einn af eigendum og ráðgjöfum Intellecta en lét af störfum í mars sl. og seldi hlut sinn í fyrirtækinu. Hann er rekstrarfræðingur að mennt. Þar sem Torfi vill sjá breyttar áherslur í borginni þá ákvað hann að setja saman óháð framboð til borgarstjórnarkosninga og nýta sérþekkingu sína við að velja hæft fólk til verka.

Samgöngumálin brenna á Torfa og eru stærsta ástæða þess að hann lagði af stað í þessa vegferð. Hann vill göng í stað Sundabrautar sem er bæði öruggari og umhverfisvænni ferðamáti en brú yfir sundin. Aðrar áherslur hjá honum eru m.a. á greiðari umferð og næg bílastæði við nýbyggingar sem og næg bílastæði í öðrum eldri hverfum. Torfi styður að sjálfsögðu góðar almenningsamgöngur og það góða er að það er hægt að útfæra þau mál mun betur en til stendur í dag. Þannig geta þeir sem vilja fremur aka sjálfir og þeir sem vilja fremur nota almenningssamgöngur lifað í sátt og samlyndi.

Hvað segir Torfi ráðningasérfræðingurinn um sjálfan sig; hvers vegna var hann valinn á listann?

„Í 35 ár hef ég starfað í einkageiranum við ráðningar í sérfræði- og stjórnunarstörf. Mitt leiðarljós hefur verið að hver ráðning sé mikilvæg fjárfesting og því skiptir máli að vel takist til. Þær skipta þúsundum þær ráðningar sem ég hef séð um og komið að.

Fyrst ætlaði ég eingöngu að manna sterkan framboðslista en var beðinn um að taka sæti ofarlega og nýt mín því vel í 3. sæti og hlakka til skemmtilegrar kosningabaráttu.“

4. sæti

Nathalia B. Tómasdóttir

Nathalia hefur starfað um árabil við rekstur, ráðgjöf og markaðsmál. Hún er stofnandi og eigandi NIBA ehf. Í störfum sínum hefur hún komið að fjölbreyttum verkefnum við að efla ímynd aðila, móta skýra stefnu og skapa ný tækifæri til vaxtar.
Sem einstaklingur með alþjóðlegan bakgrunn og víðtæka reynslu af því að byggja líf milli menningarheima hefur Nathalia sterkan skilning á stöðu fólks af erlendum uppruna, mikilvægi þátttöku og þeim tækifærum sem felast í fjölbreyttu samfélagi.
Hún telur mikilvægt að hæfileikar, reynsla og framlag allra fái notið sín, óháð uppruna.

Nathalia telur að sterk samfélög byggist á gagnkvæmri virðingu, þátttöku og ábyrgð. Hún leggur áherslu á að þau sem setjast að í nýju landi fái tækifæri til að vaxa og blómstra. Það gera þau með því að læra tungumálið og samlagast samfélagi og gildum landsins.

Hvað segir Torfi ráðningasérfræðingurinn, hvers vegna var Nathalia valin á listann?

„Nathalia kom til Íslands 17 ára og kunni þá ekki orð í íslensku. Hún hefur verið mörgum erlendum einstaklingum sem hafa sest hér að góð fyrirmynd varðandi það að tileinka sér íslensku og vera virk í íslensku samfélagi.

5. sæti

Jón L. Árnason

Jón hefur verið framkvæmdastjóri Lífsverks lífeyrissjóðs frá 2015. Um sl. áramót sameinuðust Lífsverk og Almenni lífeyrissjóðurinn og mun Jón starfa hjá sameinuðum sjóði fram á mitt ár. Áratuginn á undan starfaði Jón við eignastýringu í Kaupþingi og Arion banka, m.a. sem forstöðumaður einkabankaþjónustu og framkvæmdastjóri lífeyrissjóða í rekstri bankans. Jón er viðskiptafræðingur og með próf í verðbréfaviðskiptum. Hann er stórmeistari í skák og helgaði sig um tíma skáklistinni.

Jón telur að stjórn borgarinnar eigi að snúast um þjónustu við íbúana og bætt lífsgæði. Hann telur brýnt að hverfa frá núverandi stefnu í skipulags- og samgöngumálum sem séu komin í óefni. Hann telur að bæta þurfi verkferla við fjármálastjórn borgarinnar og gæti megi aðhalds án þess að það komi niður á þjónustu. Of mörg dæmi hafi verið um sóun fjármuna í einstökum verkefnum.

Hvað segir Torfi ráðningasérfræðingurinn, hvers vegna var Jón valinn á listann?

„Það var okkur mikill fengur að Jón L. Árnason væri áhugasamur um að ganga til liðs við framboðið og vera ofarlega á lista. Jón hefur átt einstaklega farsælan feril í atvinnulífinu og nýtur mikillar virðingar.

Íslendingar eiga ekki marga heimsmeistara en Jón varð heimsmeistari í skák 17 ára og yngri árið 1977 og hefur verið þjóðþekktur síðan.“

6. sæti

Björn Jóhann Þórsson

Björn starfar sem hugbúnaðarsérfræðingur hjá Fjársýslu ríkisins á sviði Umbóta og þróunar. Þar er hlutverk hans að bæði sjálfvirknivæða og einfalda verkferla. Hann er menntaður orkuverkfræðingur ásamt því að hafa tekið mörg námskeið í MBA og gerð hugbúnaðar og fjármálamódela. 105 er hverfið hans Björns. Þar ólst hann upp og býr í dag ásamt sambýliskonu.

Björn æfði frjálsar íþróttir í 13 ár hjá ÍR og fótbolta með Val. Í frístundum fylgist hann vel með íþróttum, spilar borðspil við fjölskyldu og vini og tölvuleikir fá einnig hluta af tíma hans.

Hann er mikill keppnismaður, vinnusamur og með eindæmum úrræðagóður. Slíkir eiginleikar eiga eftir að nýtast vel þegar stefnt er að því að ná árangri í borgarstjórn.

Hvað segir Torfi ráðningasérfræðingurinn, hvers vegna var Björn valinn á listann?

„Björn Jóhann er frábær fulltrúi þeirra kynslóðar sem á næstu árum tekur við ábyrgðar lykilhlutverkum í okkar samfélagi hvort heldur í atvinnulífi eða öðrum störfum samfélaginu til heilla.

Sjálfvirkni og stafrænar umbætur á sviði upplýsingatækni eru hans fag.“